केही समयअघिको एक भाइरल भिडियोमार्फत बलिउड अभिनेता बाबिल खान चर्चामा आएका थिए। उक्त भिडियोमा उनले फिल्म इन्डस्ट्रीलाई ‘फेक’ भनेको आरोप लागेपछि उनको भनाइले विवाद निम्त्याएको थियो। बाबिलको टिमले भने उक्त भनाइको गलत अर्थ लगाइएको स्पष्टीकरण दिएको थियो।
यही विवादको छायामा अब बाबिलले फिल्मी दुनियाँबाट केही समयका लागि ब्रेक लिने घोषणा गरेका छन्। साथै, उनले निर्देशक साई राजेशसँगको नयाँ फिल्म पनि छोडेका छन्। सामाजिक सञ्जालमार्फत बाबिलले भनेका छन्, “निकै हिम्मत र आपसी सम्मानका साथ मैले राजेश सरको जादुई यात्रामा कदम राखेको थिएँ। दुर्भाग्यले अलग स्थिति आयो। जस्तो योजना बनाएका थियौं, त्यस्तो भएन। म फिल्मबाट केही समयको लागि ब्रेक लिदैछु। त्यसैले साई राजेश सर र उहाँको टिमलाई आगामी यात्राको लागि शुभकामना दिन चाहन्छु। मलाई थाहा छ कि हामीबीच धेरै माया छ र हामी भविष्यमा छिट्टै भेट्ने छौं।”
बाबिल, दिवंगत अभिनेता इरफान खानका छोरा हुन्। बुबाको निधनपछि बाबिलले बलिउडमा आफ्नो अभिनय यात्रा सुरु गरेका थिए र छोटो समयमा उल्लेखनीय चर्चा बटुलेका थिए।
