बुटवल, जेठ ९ — बुटवल उपमहानगरपालिका क्षेत्रमा लागू औषध कारोबारमा संलग्न चार जनालाई प्रहरीले पक्राउ गरेको छ।
जिल्ला प्रहरी कार्यालय रुपन्देहीका अनुसार बुधबार राती करिब ११ बजे बुद्धनगर क्षेत्रमा ब्राउन सुगरको अवैध कारोबार भैरहेको भन्ने गोप्य सूचनाको आधारमा लागू औषध नियन्त्रण ब्यूरो शाखा कार्यालय भैरहवा र वडा प्रहरी कार्यालय बुटवलको संयुक्त टोली खटिएको थियो।
प्रहरी टोलीले बुद्धनगरमा चेकजाँच गर्ने क्रममा ४ ग्राम ३८० मिलिग्राम ब्राउन सुगर र एक थान डिजिटल तराजु फेला पार्दै चार जनालाई पक्राउ गरेको हो। पक्राउ परेकामध्ये बुटवल उपमहानगरपालिका वडा नं. ११ बस्ने २४ वर्षीय विष्णु थापा, वडा नं. ७ शिवनगर बस्ने २४ वर्षीय सन्दिप सुनार, कपिलवस्तु यशोधरा गाउँपालिका वडा नं. १ का २९ वर्षीय विवेक चौधरी र कृष्णनगर नगरपालिका वडा नं. ९ का २० वर्षीय विपिन चौधरी रहेका छन्।
हाल चारै जनालाई जिल्ला अदालत रुपन्देहीबाट ७ दिनको म्याद थप गराई इलाका प्रहरी कार्यालय बुटवलमार्फत थप अनुसन्धान अगाडि बढाइएको प्रहरी कार्यालयले जनाएको छ।
