पोखरा, जेठ ९ – पोखरामा जारी श्री गण्डकी शतकुण्डीय गायत्री कोटिहोम विराट ज्ञान महायज्ञ बुधबार विशेष रूपमा भक्तिमय वातावरणमा सम्पन्न भएको छ। यस दिन प्रवचन स्थलमा भक्तजनहरूको उल्लेखनीय उपस्थिति देखिएको थियो भने थाहा नगरपालिकाबाट उच्चस्तरीय प्रतिनिधिमण्डल सहभागी भएकोले कार्यक्रम अझ विशेष बन्यो।
थाहा नगरपालिकाका नगरप्रमुख विष्णुबहादुर विष्ट, उपप्रमुख भरत गोपाली, र अन्य कर्मचारीहरूको सहभागिताले कार्यक्रमको गरिमा बढाएको थियो। नगरप्रमुख र उपप्रमुखले प्रवचनस्थलमै धार्मिक संगीतमाथि नाच्दै उपस्थित भक्तजनहरूसँग उत्सवमा रमाएका थिए।
कार्यक्रममा नगरप्रमुख विष्टले ज्येष्ठ नागरिकहरूलाई सम्मान र सेवा गर्नुपर्ने कुरामा जोड दिंदै कोटिहोम आयोजनाका लागि १ लाख ११ हजार १ सय ११ रुपैयाँ सहयोग गर्ने घोषणा गरे। यो सहयोग व्यक्तिगत र संस्थागत रूपमा उपलब्ध गराइने उनले स्पष्ट पारेका थिए।
स्थानीय बासिन्दाहरूले नगरप्रमुखको सक्रियता र सहयोगी प्रवृत्तिप्रति आभार व्यक्त गरे। उनीहरूको उपस्थिति र सक्रिय सहभागिताले कार्यक्रममा राष्ट्रिय स्तरको रौनक दिएको जनाइएको छ। यो महायज्ञमा पहिलोपटक पोखराबाहिरका पालिकाका प्रमुखहरूको सहभागिता देखिएको हो।
महायज्ञका संकल्पकर्ता बालयोगेश्वर श्री विजयकृष्णमूर्तिजी महाराजले विष्टको सहभागिताको खुलेर प्रशंसा गर्दै अन्य नगर प्रमुखहरूलाई पनि यस्ता कार्यक्रममा सक्रिय सहभागिता जनाउन आह्वान गरे।
कार्यक्रम अवधिभर नगरप्रमुखसहितको टोलीले कोटिहोम स्थलको अवलोकन गरे। भक्तजनहरूले उनीहरूको आगमनलाई ताली बजाएर स्वागत गरेका थिए। सजावट, सांस्कृतिक कार्यक्रम, र प्रवचनले सम्पूर्ण स्थललाई धार्मिक उत्सवको रंगमा रंग्याएको थियो।
धार्मिक तथा सामाजिक समर्पणयुक्त यस्ता कार्यक्रममा स्थानीय जनप्रतिनिधिहरूको सहभागिताले समाजमा एकता, सांस्कृतिक गौरव, र नेतृत्व प्रतिको विश्वास मजबुत बनाउने जनविश्वास कार्यक्रमबाट झल्किएको छ।
