नयाँ दिल्ली — भारतका जम्मू–कश्मीर, पञ्जाब र राजस्थान राज्यका ११ सहरमा पाकिस्तानी ड्रोन र मिसाइल आक्रमण भएको पुष्टि भारतीय सञ्चारमाध्यमहरूले गरेका छन्। पछिल्ला दुई दिनदेखि पाकिस्तानले भारततर्फ ड्रोन प्रहार गरिरहेको छ।
जम्मू–कश्मीरका जम्मू, साम्बा, केरन, तंगधार, कर्नाह, अखनूर, आरएस पुरा सेक्टर र अरनिया; पञ्जाबको पठानकोट; तथा राजस्थानका जैसलमेर र पोखरणमा ड्रोन आक्रमण भएको जनाइएको छ। पाकिस्तानले जम्मू विमानस्थल र पठानकोट वायुसेना स्टेसनमा पनि आक्रमणको प्रयास गरेको भए पनि भारतीय वायु रक्षा प्रणालीले उक्त आक्रमणलाई विफल बनाएको दाबी गरिएको छ।
राजस्थानका सीमावर्ती जिल्लाहरूमा सुरक्षा सतर्कता स्वरूप पूर्ण ब्ल्याकआउट गरिएको छ। पञ्जाबको जालन्धर र अमृतसर, तथा बीकानेर र श्रीगंगानगरमा पनि अन्धकार गरिएको छ। जम्मू, किस्तवाड, अखनूर, साम्बा र पठानकोट क्षेत्रमा पनि उस्तै आदेश जारी गरिएको छ।
आरएस पुरा सेक्टरमा भने पाकिस्तानतर्फबाट भारी गोलाबारी भइरहेको छ भने नियन्त्रण रेखा नजिकै कुपवाडा र बारामुल्लामा दुवै पक्षबीच तीव्र गोली हानाहान जारी रहेको बताइएको छ।
यस सैन्य तनावबीच इन्डियन प्रिमियर लिग (आईपीएल) मा असर परेको छ। हिमाञ्चल प्रदेशको धर्मशालास्थित एचपीसीए मैदानमा पञ्जाब किंग्स र दिल्ली क्यापिटल्सबीच भइरहेको खेल सुरक्षाका कारण बीचमै रोकिएको छ। मैदानका फ्लडलाइटहरू निभाएर दर्शकहरूलाई मैदान खाली गर्न लगाइएको थियो। खेल रोकिँदासम्म पञ्जाबले १०.१ ओभरमा १ विकेटको क्षतिमा १२२ रन बनाइसकेको थियो।
भारतीय सेनाले उच्च सतर्कता अपनाएको र स्थिति नियन्त्रित राख्न प्रयास भइरहेको जानकारी दिएको छ।
