७८ औं कान्स फिल्म फेस्टिभलमा बलिउड अभिनेत्री जान्हवी कपूरले डेब्यू गरेकी छन्। फ्रान्सको ग्ल्यामरले भरिएको रेड कार्पेटमा जान्हवी परम्परा र आधुनिकताबीचको सेतु जस्तो देखिइन्।
उनले लगाएको गाउन भारतीय डिजाइनर तरुण ताहिलियानीले तयार पारेका हुन्, जसले भारतीय सांस्कृतिक सुगन्ध र आधुनिक शैलीलाई मिश्रण गरेका थिए। यो विशेष गाउन उनकी दिवंगत आमा, अभिनेत्री श्रीदेवीको स्मृतिमा अर्पण गरिएको बताइएको छ।
जान्हवीलाई रेड कार्पेटमा सहयोग गर्न अभिनेता ईशान खट्टर र निर्देशक नीरज घायवान पनि साथमा थिए। उनीहरू ‘होमबाउन्ड’ नामक फिल्मको प्रिमियरका लागि फेस्टिभलमा सहभागी भएका हुन्।
जान्हवीको यो कान्स डेब्यूमा उनका नजिकका प्रियजनहरू पनि उपस्थित थिए। उनकी बहिनी खुशी कपूर, प्रेमी शिखर पहाडिया, र पुराना साथी ओरहान अवत्रामणि (ओरी) ले उनको समर्थनमा उपस्थिति जनाए।
‘होमबाउन्ड’ नीरज घायवानद्वारा निर्देशित फिल्म हो जसमा जान्हवी कपूर, ईशान खट्टर र विशाल जेठवाले प्रमुख भूमिका निर्वाह गरेका छन्। फिल्मले सामाजिक र पारिवारिक भावनालाई समेट्दै एक फरक कथा प्रस्तुत गर्ने प्रयास गरेको छ।
