काठमाडौं । सार्वजनिक लेखा समितिले गठन गरेको भैरहवा अन्तर्राष्ट्रिय विमानस्थल अध्ययन उपसमितिमा नेकपा (माओवादी केन्द्र) को प्रतिनिधित्व नहुँदा आपत्ति जनाइएको छ।
बुधबार संसद्को सार्वजनिक लेखा समितिको बैठकमा माओवादी केन्द्रका सांसद राजन दाहालले उपसमितिमा आफ्नो दललाई समावेश नगरिएको विषय उठाएका हुन्। उनले समितिमा माओवादीको अनुपस्थितिलाई असन्तुलित प्रतिनिधित्वको संकेतको रूपमा व्याख्या गरे।
उक्त उपसमितिको संयोजक नेपाली कांग्रेसकी सांसद मन्जु खाण रहेको छ भने सदस्यहरूमा एमाले सांसद योगेश भट्टराई, अच्युतप्रसाद मैनाली, सराज अहमद फारुकी, रास्वपाका मनीष झा, स्वतन्त्र सांसद अमरेशकुमार सिंह, राप्रपाका विक्रम पाण्डे, र कांग्रेसका श्यामकुमार घिमिरे रहेका छन्।
बैठकमा चिनियाँ ठेकेदार कम्पनी सीसीएमसीको मंगलबार सार्वजनिक गरिएको विज्ञप्तिप्रति पनि गम्भीर आपत्ति जनाइयो। रास्वपाका सांसद मनीष झाले सो विज्ञप्तिको भाषा र समितिमाथिको चुनौतीप्रति आपत्ति जनाउँदै त्यसलाई छाप्ने सम्पादकलाई स्पष्टीकरण सोध्नुपर्ने धारणा राखे।
कांग्रेस सांसद अर्जुननरसिंह केसीले सो विज्ञप्तिलाई अस्वीकार्य भन्दै चिनियाँ कम्पनीले खेद प्रकट गर्नुपर्ने माग गरे। त्यस्तै, एकीकृत समाजवादी पार्टीका सांसद प्रेम आलेले संसदीय समितिको अध्ययनमाथि ठेकेदार कम्पनीले प्रत्यक्ष चुनौती दिएको भन्दै आपत्ति जनाए।
बैठकमा समितिका अन्य सदस्यहरूले पनि उपसमिति गठनको सन्तुलन, पारदर्शिता र सम्मानका विषयमा चिन्ता व्यक्त गरे।
