काठमाडौं । प्राविधिक शिक्षा तथा व्यावसायिक तालिम परिषद् (सीटीईभीटी) अन्तर्गतका कुनै पनि कार्यक्रम अध्ययन गर्न अबदेखि विद्यार्थीले प्रवेश परीक्षा (इन्ट्रान्स) दिनुपर्ने छैन । परिषद्ले ‘प्रि–डिप्लोमा र डिप्लोमा तथा प्रमाणपत्र तहमा प्रशिक्षार्थी छनौट, छात्रवृत्ति वितरण तथा भर्ना सम्बन्धी निर्देशिका २०८२’ जारी गरेपछि अब एसईई वा एसएलसीमा प्राप्त अङ्ककै आधारमा विद्यार्थी छनौट हुने भएको हो ।
निर्देशिका अनुसार एसईईमा प्राप्त अङ्कलाई जीपीए ४ पूर्णाङ्क मानिनेछ । यसमा सामुदायिक विद्यालयमा अध्ययन गरेका विद्यार्थीलाई अतिरिक्त १ अङ्क र संस्थागत (निजी) विद्यालयमा अध्ययन गरेकालाई ०.८५ अङ्कका दरले योग्यता क्रम तय गरिनेछ ।
वैशाख २६ गते बसेको सीटीईभीटीको २०७ औं बैठकले परीक्षा नियन्त्रण कार्यालयलाई सो निर्णय कार्यान्वयन गर्न निर्देशन दिएको थियो । कार्यालयले निर्देशिका अनुसार यही शैक्षिक सत्रदेखि लागु हुने गरी इन्ट्रान्स परीक्षा हटाउने निर्णय लिएको हो ।
अघिल्लो वर्षसम्म सीटीईभीटी अन्तर्गतको अध्ययनका लागि पूर्व तयारी कक्षा चलाइने गरिएको थियो, जसमा विद्यार्थीबाट मोटो रकम असुल्ने गरिएको थियो । सो व्यवस्था हटाइएपछि विद्यार्थीहरू सीधा जीपीएको आधारमा भर्ना हुन सक्नेछन् ।
देशभर रहेका ६३ वटा आङ्गिक र ४०० भन्दा बढी प्रतिष्ठान एवं निजी कलेजहरूमा हरेक वर्ष २५ हजारभन्दा बढी नयाँ विद्यार्थी भर्ना हुने गरेका छन् । अब ती विद्यार्थीले अनलाइनमार्फत आफूले रोजेको शिक्षालय तथा विषयमा भर्ना फारम भरन सक्नेछन् । आङ्गिक र सम्बन्धन प्राप्त क्याम्पसहरूले फारम भर्न सहजता मिलाउनेछन् ।
स्वास्थ्य तथा प्रविधि विज्ञान मञ्चका महासचिव निर्मला सापकोटाले यो परिवर्तनले विद्यार्थीहरूलाई निकै सहज हुने बताएकी छन् । उनका अनुसार अब इन्ट्रान्स परीक्षा फारम भर्ने, परीक्षा दिने र परिणाम कुर्ने झन्झट हट्नेछ । यससँगै सीटीईभीटीको परीक्षा नियन्त्रण कार्यालय पनि शैक्षिक क्यालेन्डरअनुसारका परीक्षा सञ्चालन र नतिजा प्रकाशनमा केन्द्रित हुन पाउनेछ ।
