जस्मिन पाओलिनीले इटालीको टेनिस इतिहासमा नयाँ अध्याय लेखेकी छन्। उनले इटालियन ओपन २०२५ को महिला एकल उपाधि जित्दै ४० वर्ष लामो प्रतिक्षा अन्त्य गरिन्। रोमको फोरो इटालिको कोर्टमा भएको फाइनल खेलमा उनले अमेरिकी खेलाडी कोको गफलाई ६–४, ६–२ को सिधा सेटमा हराइन्।
यो ऐतिहासिक जित इटालीका टेनिस समर्थकहरूका लागि भावुक क्षण बन्यो। राष्ट्रपतिसमेत उपस्थित खेल मैदानमा २९ वर्षीया पाओलिनीले १ घण्टा २९ मिनेटको उत्कृष्ट प्रदर्शनमार्फत उपाधि जितिन्।
सन् १९८५ मा राफाएला रेगीपछि यो उपाधि जित्ने उनी पहिलो इटालियन महिला बनिन्। साथै, प्रतियोगिता सुरु भएको सन् १९३० यता उनी समग्रमा चौथो इटालियन विजेता पनि हुन्।
खेलपछि सञ्चारकर्मीहरूसँग बोल्दै उनले भनिन्, “ट्रफी हातमा लिनु सपना जस्तै हो। म सानो हुँदा यो प्रतियोगिता हेर्न यहाँ आउँथें। अहिले भने म आफैँ विजेता बनेकी छु, जुन अकल्पनीय अनुभव हो।”
पाओलिनीको यो जितले उनको विश्व वरीयता चौथो स्थानमा पुर्याउनेछ। साथै, उनी फ्रेन्च ओपनमा शीर्ष चार सिडमा रहनेछिन्।
इटालीका लागि यो केवल एक उपाधि होइन, वर्षौँको मेहनत, लगनशीलता र आत्मविश्वासको पुरस्कार हो।
