काठमाडौं – गृहमन्त्री रमेश लेखकले कुनै पनि धर्मलाई राजनीतिक उद्देश्य पूरा गर्न प्रयोग गर्नु अस्वीकार्य रहेको बताएका छन् । सोमबार प्रतिनिधिसभाको बैठकमा सांसदहरूले उठाएका प्रश्नको जवाफ दिँदै उनले धर्मको नाममा हिंसा, अराजकता वा आपराधिक कार्यलाई कुनै हालतमा सहन नहुने स्पष्ट पारेका हुन् ।
उनले तीनकुनेमा चैत १५ गते भएको राजतन्त्रको वकालत संविधानको भावना र मर्म विपरीत भएको बताए । “तीनकुनेमा गरिएको राजतन्त्र वकालतको विषय नेपालको संविधान विपरीत छ, जसलाई कुनै पनि सन्दर्भमा उचित मान्न सकिँदैन”, मन्त्री लेखकले भने ।
गृहमन्त्रीले थपे कि कुनै पनि धर्मलाई राजनीतिक लाभको लागि प्रयोग गर्नु न त संविधान अनुसार हो, न नै सामाजिक सद्भावको दृष्टिकोणले उचित । उनले भने, “धार्मिक आवरणमा अपराधजन्य गतिविधि गर्नु, असहिष्णुता फैलाउनु र अराजकता सिर्जना गर्नु कानुनी रूपमा पनि दण्डनीय छ ।”
गृहमन्त्रीका अनुसार तीनकुने घटनामा भएको आगजनी र हिंसा आपराधिक गतिविधि हुन्, जसलाई धर्म वा आस्थासँग जोडेर हेर्न मिल्दैन । उनले धर्मको नाममा उन्मुक्ति खोज्ने प्रयासहरूलाई रोक्नुपर्ने बताए ।
उनले धर्म निरपेक्ष राष्ट्रको अवधारणा स्मरण गराउँदै भने, “कुनै धर्म उत्कृष्ट र कुनै अनुत्कृष्ट भन्ने सोच संविधानले मान्दैन । सबै धर्मप्रति सम्मान गर्नुपर्छ र सबै नागरिकको समान हैसियत सुनिश्चित गर्नुपर्ने राज्यको दायित्व हो ।”
सरकारले यस्ता घटनाबारे गम्भीर समीक्षा गरिरहेको पनि गृहमन्त्रीले जानकारी दिए । घटनाका दोषीमाथि कानुनी कारबाही हुने र धर्मको नाममा समाज विखण्डन गर्ने कुनै पनि प्रयास सफल हुन नदिइने उनले बताए ।
